©អត្ថបទដោយ ភូ ចរិយា
©រូបភាពដោយ អាច្រូច
©រាល់ការចម្លងដោយគ្មានការរអនុញ្ញាតិពីនគរអាន នឹងត្រូវមានទោសតាមច្បាប់
 |
| ខ្មោចទៅម៉ាស្សា |
ពេលយប់រំលងអធ្រាត្រ មានភ្ញៀវនារីម្នាក់ដើរចូលទៅក្នុងហាងម៉ាស្សា។ ថារី ជាអ្នកទទួលភ្ញៀវ។ នាងកំពុងអង្គុយលើសាឡុងមើលទូរទស្សន៍។ ពេលឃើញភ្ញៀវ នាងស្ទុះក្រោកឈរ រួចនិយាយស្វាគមន៍ភ្ញៀវបណ្តើរ ដើរទៅរកតុរបស់នាងបណ្តើរ ៖
- ជម្រាបសួរបង! ត្រូវការម៉ាស្សា ស្ទីម សូណា ឬស៉្បា?
ភ្ញៀវនារីតបវិញ៖
- ខ្ញុំត្រូវការម៉ាស្សា។
ថារីសួរ៖
- ម៉ាស្សាអីដែរបង?
ភ្ញៀវនារីក៏ឆ្លើយ៖
- ម៉ាស្សាជើង។
ថារីសួរបន្ត៖
- តែម្នាក់ឯងទេឬបង?
ភ្ញៀវនារីតប៖
- ចាស៎ ម្នាក់ឯង! ប៉ុន្តែ...
- ម៉េចដែរបង?
ភ្ញៀវនារីងាកមើលចុះឡើង រួចពោលតិចៗទៅកាន់ថារីថា៖
- ខ្ញុំត្រូវការអ្នកម៉ាស្សាប្រុស។ ថារីញញឹម រួចតប៖
- ចាស៎ បង! ហាងយើងមានអ្នកម៉ាស្សាទាំងស្រី និងប្រុស។ អញ្ជើញមកតាមខ្ញុំមក ខ្ញុំនាំបងទៅបន្ទប់។
ថារីបាននាំភ្ញៀវទៅកាន់បន្ទប់មួយនៅទល់មុខតុរបស់នាង។ ភ្ញៀវនារីដើរចូលទៅក្នុងបន្ទប់ រួចអង្គុយលើកៅអីម៉ាស្សា។ ថារីសួរទៅភ្ញៀវ៖
- បងត្រូវការពិសាទឹកអីដែរ?
ភ្ញៀវនារីសួរ៖
- មានអីខ្លះ?
ថារីរៀបរាប់៖
- មានតែក្តៅ និងតែជ្រក់ មានក្តៅត្រជាក់។
ភ្ញៀវនារីគិតមួយភ្លែតទើបឆ្លើយ៖
- យកតែជ្រក់ក្តៅ។
ថារីឆ្លើយចាស រួចដើរចេញពីបន្ទប់ ទៅរៀបចំភេសជ្ជៈឲ្យភ្ញៀវ។ បីនាទីក្រោយ នាងលើកតែជ្រក់មកឲ្យភ្ញៀវ ព្រមជាមួយគ្នានឹងអ្នកម៉ាស្សាប្រុសឈ្មោះ សំណាង។ នាងគោះទ្វារមុនសិន ក្រែងលោភ្ញៀវកំពុងផ្លាស់ខោអាវ។
ពេលឮភ្ញៀវស្រែកប្រាប់ឲ្យចូល ទើបនាងបើកទ្វារ។ ភ្ញៀវនារីបានផ្លាស់សម្លៀកបំពាក់ម៉ាស្សារួចរាល់ហើយ។
ថារីដាក់ទឹកលើតុតូចជាប់នឹងកៅអីម៉ាស្សា រួចនាងចេញពីបន្ទប់។ សំណាងលើកដៃសំពះភ្ញៀវ៖
- ជម្រាបសួរបង!
ភ្ញៀវនារីលើកដៃសំពះតបវិញ។ សំណាងបម្រុងនឹងអង្គុយលើកៅអីទល់មុខភ្ញៀវ ស្រាប់តែនាងប្រាប់៖
- ជួយម៉ាស្សាស្មាឲ្យខ្ញុំមុនសិន!
សំណាងឆ្លើយបាទ រួចដើរទៅឈរពីក្រោយកៅអីរបស់ភ្ញៀវ ហើយម៉ាស្សាស្មាទាំងពីរដោយថ្មមៗ។ គេសួរភ្ញៀវ៖
- កម្លាំងល្មមទេបង?
ភ្ញៀវនារីកំពុងបិទភ្នែកសម្ងំ។ ឮសំណួររបស់សំណាង នាងក៏ឆ្លើយ៖
- ខ្លាំងជាងហ្នឹងបន្តិច!
សំណាងប្រើកម្លាំងធ្ងន់បន្តិចទៀត តែភ្ញៀវថា មិនទាន់ពេញចិត្ត គេក៏លេងម៉ាទំហឹង ទើបភ្ញៀវនារីញញឹមថា ចង់បានអ៊ីចឹងអ្ហៈ។ ការម៉ាស្សាដៃធ្ងន់នេះ ពិតជាឆាប់អស់កម្លាំង ប៉ុន្តែដើមី្បបំពេញចិត្តភ្ញៀវ សំណាងខំប្រឹង មិនហ៊ានបន្ធូរទេ។ គេឆ្ងល់ណាស់ថា គេធ្លាប់ម៉ាស្សាឲ្យភ្ញៀវច្រើននាក់ហើយ មានប្រុសមានស្រី ហើយមានបរទេសទៀតហើយ តែគ្មាននរណាឲ្យប្រើកម្លាំងដល់ថ្នាក់នេះទេ ហើយភ្ញៀវនេះជានារីទៀត.. នេះជាលើកទីមួយហើយ។
នៅមានទៀត សំណាងប្រទះឃើញមានចំហាយត្រជាក់ចេញពីស្មារបស់ភ្ញៀវ។ នាយខ្លាចភ្ញៀវរងា ក៏សួរ៖
- បង! បងត្រជាក់ទេ? ឲ្យខ្ញុំដំឡើងកម្តៅឬអត់?
- មិនបាច់ទេ! (ភ្ញៀវនារីឆ្លើយដោយបិទភ្នែក) បើកអស់លេខឬនៅ? បើមិនទាន់ បើកឲ្យអស់ទៅ!
សំណាងឆ្លើយបាទ ហើយធ្វើតាមបញ្ជាភ្ញៀវ ចុចលេខទាបជាងគេបំផុត។ នាយមិនដែលប្រទះទេ.. នាយឡើងចង់រឹងថ្គាម តែនាងបែរជាដេកធ្វើព្រងើយ។
ម៉ាស្សាស្មារួច សំណាងក៏ដើរមកអង្គុយលើកៅអីនៅជើង ដើមី្បម៉ាស្សាជើងឲ្យភ្ញៀវ។ ពេលនាយអង្គុយចុះ នាយអត់ឃើញប្រអប់ជើង។ សំណាងភ្ញាក់ព្រើត។ គេមីងមាំង រួចក៏នឹកថា ប្រហែលជាភ្ញៀវនេះមានជើងខ្លី ហើយខោវែងពេកនាំឲ្យលុបបាត់ប្រអប់ជើង រួចគេក៏មូរជើងខោឡើងលើ..
អត់ឃើញជើង។ មូរទៀត មូរទៀត ឡើងដល់ចង្កេះខោហើយ អត់ឃើញជើង។ សំណាងបើកភ្នែកធំៗ ងើយមុខមើលទៅភ្ញៀវ ឃើញអត់មានក្បាល។ សំណាងស្រែកភ្លាត់សំឡេង ធាក់កៅអីម៉ាស្សា ដួលបះជើងទៅក្រោយ។
គេស្ទុះក្រោកឡើង រត់ទៅមួលសោទ្វារ។ មួលបណ្តើរស្រែកបណ្តើរ.. គេភ័យពេក នាំឲ្យដៃញ័រមួលសោមិនរបើក។ សំណាងរឹតតែភ័យ យកជើងធាក់ទ្វារលាន់ឮប៉ាំងៗ.. មួល ធាក់ មួល ធាក់.. ពីរបីដង ទ្វារក៏របើក។
សំណាងរត់ចេញពីបន្ទប់ដួលទីណាត់ទីណែង ស្រែកឡើងផ្អើលថារី សន្តិសុខ និងអ្នកម៉ាស្សាពីរបីនាក់ដែលប្រចាំការពេលយប់ រត់មកសួរ៖
- មានរឿងអី? មានរឿងអី?
សំណាងរត់ផងយំផងទៅពួនក្រោយខ្នងថារី។ គេឡើងញ័រអស់ទាំងខ្លួន។ គ្រប់គ្នាសួរ តែគេឆ្លើយមិនចេញ បានត្រឹមតែចង្អុលទៅកាន់បន្ទប់។
គ្រប់គ្នាមិនហ៊ានទៅទេ ឲ្យពូសន្តិសុខទៅមើល។ ពូសន្តិសុខដើរលបៗទៅជិតដល់ទ្វារ ស្រាប់តែទ្វារបិទដោយខ្លួនឯងគ្រាំង។ ម្នាក់ៗស្រែកវ៉ាស ពូសន្តិសុខក៏ស្រែកដែរ ហើយថយក្រោយបីជំហាន។
ពេលនោះ ទ្វារចូលហាងម៉ាស្សាដែលបិទ ស្រាប់តែបើកខ្វាក ហើយបិទវិញគ្រឹប ដូចមានមនុស្សធ្វើ។ គ្រប់គ្នារត់មកផ្តុំគ្នានៅក្រោយថារី។
សំណាងឡើងស្លេកស្លាំង អង្គុយចុះញាក់ទទ្រើត។ ឃើញដូច្នោះ ពូសន្តិសុខហាក់យល់ការ ក៏ទៅសុំទឹកអប់ដែលម្ចាស់ហាងដាក់នៅលើហ៊ឹងព្រះពុទ្ធរូប មកបាញ់លើក្បាលសំណាងពីរបីឈីត សំណាងស្រាប់តែបាត់ញ័រដូចគេបេះ។
គ្រប់គ្នាជួយលើកសំណាងទៅអង្គុយលើសាឡុង ហើយអង្គុយជុំវិញគេសួរនាំរឿងហេតុ។ សំណាងបានរៀបរាប់ឲ្យគ្រប់គ្នាស្តាប់។ ម្នាក់ៗបះរោម។
ពេលនោះពូសន្តិសុខបានពោលថា៖
- មានភ្ញៀវមកដែរ? ខ្ញុំអង្គុយនៅមាត់ទ្វាររហូត អត់ឃើញមាននរណាមកទេ សូមី្បតែឆ្កែដើរកាត់ក៏អត់មានដែរ។
ថារី និងសំណាងអះអាងថាមានភ្ញៀវ ធ្វើឲ្យម្នាក់ៗពិតជាព្រឺសម្បុរខ្លាំងណាស់។ ចុងក្រោយ ពួកគេសម្រេចចិត្តសាកាមេរ៉ាមើល។ ម្នាក់ៗប្រឹងមើលដោយយកចិត្តទុកដាក់។ នាឡិកាម៉ោង ១:១២ នាទី ទ្វាររបើក។ ថារីកំពុងនៅសាឡុង ស្រាប់តែក្រោកឈរ ហើយដូចនិយាយទៅកាន់នរណាម្នាក់។
បន្ទាប់មកនាងដើរទៅកាន់តុ រួចនិយាយម្នាក់ឯងមួយស្របក់ ទើបដើរទៅបើកទ្វារបន្ទប់ ចូលទៅ រួចចេញមកវិញម្នាក់ឯង ដើរទៅក្រោយ នាំសំណាង និងកាន់តែជ្រក់មកចូលបន្ទប់នោះ។
បន្ទាប់មក នាងក៏ចេញមកវិញមកនៅឯតុ។ ម៉ោង ១:៣០ នាទី សំណាងរត់ចេញពីទ្វារ ដួលនៅមុខទ្វារ រួចរត់ទៅរកថារី... មើលបានតែប៉ុណ្ណឹង ថារីបិទភឹប។
នាងថា៖
- ឈប់មើលទៅ! បានហើយ! ឈប់មើលហើយ..មិនមែនមនុស្សទេ.. បិទទ្វារទៅ! លែងទទួលភ្ញៀវហើយ។
ពូសន្តិសុខរត់ទៅចាក់សោទ្វារចូលយ៉ាងលឿន។ បុគ្គលិកម៉ាស្សាម្នាក់សួរទៅថារី៖
- តិចលោមានភ្ញៀវ.. បើថៅកែដឹងច្បាស់ជាស្តីឲ្យមិនខាន។
ថារីតប៖
- ទុកឲ្យបងទទួលខុសត្រូវ។ បងសុខចិត្តត្រូវមាត់ ក៏មិនចង់ទទួលខ្មោចម្តងទៀតដែរ។
យប់នោះពួកគេនៅផ្តុំគ្នា ហើយពូសន្តិសុខកាន់ទឹកអប់ព្រះនៅនឹងដៃជាប់។ បន្ទប់ម៉ាស្សានៅទុកចោលដល់ភ្លឺ ទើបឲ្យអ្នកសម្អាតចូលទៅរៀបចំ។
ពេលថៅកែមកដល់ ថារីបានរៀបរាប់ប្រាប់ហេតុការណ៍កាលពីយប់ និងឲ្យថៅកែមើលវីដេអូភស្តុតាង។ ថៅកែមិនមាត់មួយម៉ាត់ តែបានទូរស័ព្ទនិមន្តព្រះសង្ឃមកសូត្រមន្តរំដោះគ្រោះ។
នៅពេលថ្ងៃ ក្រោយបាយរួច ពូសន្តិសុខបានចូលមករកថារី រួចបង្ហាញព័ត៌មានតាមទូរស័ព្ទឲ្យថារី សំណាង និងបុគ្គលិកឯទៀត។ ព័ត៌មាននោះនិយាយថា កាលពីល្ងាចមិញ ប្រមាណម៉ោង៨ យប់ មាននារីម្នាក់ដេកស្លាប់នៅកៀនចិញ្ចើមថ្នល់។ តាមការស្រាវជ្រាវ នារីនោះអាចនឹងជំពប់ដួលរួចបោកក្បាលស្លាប់ភ្លាមៗ ព្រោះគ្មានស្លាកស្នាមបុក ប៉ះ ទង្គិច ឬការវាយប្រហារឡើយ។ បើតាមប្អូនស្រីរបស់នារីរងគ្រោះបានរៀបរាប់ថា បងរបស់នាងបានដើរចេញពីផ្ទះដោយប្រាប់ថាចង់ទៅម៉ាស្សានៅវេលាម៉ោង៦កន្លះល្ងាច។ នាង និងក្រុមគ្រួសារមិនបានចាប់អារម្មណ៍អ្វីឡើយ ទាល់តែម៉ោងជាង៨ យប់ ទើបអ្នកជិតខាងរត់មកប្រាប់ថា បងនាងស្លាប់ នៅកាច់ជ្រុងផ្លូវ។ ព្រោះតែផ្លូវនោះស្ងាត់ មិនសូវមានមនុស្សឆ្លងកាត់ ជាពិសេសពេលព្រលប់ ដូច្នេះទើបគ្មានអ្នកណាប្រទះ លុះអ្នកជិតខាងម្នាក់នោះជិះម៉ូតូមកពីដើរលេង ក៏ឃើញសាកសព ស្គាល់ច្បាស់ពីអត្តសញ្ញាណក៏ប្រញាប់ទៅប្រាប់អ្នកផ្ទះរបស់នាង។
អានរួចហើយ អ្នកដែលប្រចាំការកាលពីយប់លេបទឹកមាត់ក្អឹកៗ ឡើងព្រឺសម្បុរ។ ថារីហុចទូរស័ព្ទឲ្យពូសន្តិសុខវិញ តែគាត់ប្រាប់ថា៖
- នៅសល់មួយឃ្លាក្រោមទៀត អានមើលទៅ...
ថារីក៏អាន៖
- សូមបញ្ជាក់ថា នារីរងគ្រោះនេះជាបុរសកែភេទ។
គ្រាន់តែឮ សំណាងក្អួតវ៉ក...
អត្ថបទរឿងខ្មោចមាននៅLinkខាងក្រោម
- ខ្មោចចងក
0 Comments