កាពូស៊ីណូបេះដូង

កាពូស៊ីណូបេះដូង

©អត្ថបទដោយ ហេង ដារី 

©រូបភាពដោយ ហេង សុធារៈ 

©រាល់ការចម្លងដោយគ្មានការរអនុញ្ញាតិពីនគរអាន នឹងត្រូវមានទោសតាមច្បាប់

កាពូស៊ីណូបេះដូង

- បង! នេះកាពូស៊ីណូ ស្ករ០% មកហើយ! (អ្នកលក់និយាយតិចៗក្បែរខ្ញុំ) 

- អរគុណ! 

ខ្ញុំឆ្លើយ ដោយញញឹមពព្រាយទៅអ្នកលក់ រួចក៏ឱនមើលពែងកាហ្វេរបស់ខ្ញុំដ៏គួរឱ្យទាក់ទាញ។ ក្លិនគ្រីមឈ្ងុយស្រាលភាយចេញពីពែងកាហ្វេ រីឯការតុបតែងនៅ​លើ​ពែងកាហ្វេវិញ ក៏មិនអន់ដែរ។ ហើយខ្ញុំកាន់តែរំភើប ដោយសារអ្នកលក់កាហ្វេជានារីក្មេងរួសរាយ ញញឹមញញែមដាក់អ្នកទិញដូចខ្ញុំ។ 

និយាយមែន ខ្ញុំស្ទើរតែមិនហ៊ានលើកពែងផឹកសោះ ព្រោះតែបេះដូងដ៏សែនស្អាត នៅលើកាហ្វេដែលមានសំបុរស្រស់ដូចខ្ញុំនោះឯង។ និយាយមែន ខ្ញុំផឹកកាពូស៊ីណូក្តៅនៅទីនេះ តាំងពីអ្នកលក់បាញ់រូបផ្កាធម្មតាៗ រហូតដល់រូបបេះដូង នៅលើ​គ្រីម​ទឹកដោះគោ។ 

ហ៊ឹម! រសជាតិជាប់ចិត្ត ដិតបេះដូង ហើយកាបូបលុយខ្ញុំក៏ជាប់នៅតូបកាហ្វេនេះដែរ។ 

គេថា ផឹកកាហ្វេអស់លុយ? អស់មែនតើ អស់នៅទីនេះ ៥ថ្ងៃក្នុង១អាទិត្យ! ហើយអស់២ថ្ងៃទៀតនៅចុងសប្តាហ៍ នៅផ្ទះខ្ញុំ។ 

ចំណាយចំគោលដៅអ៊ីចឹង ក្នុងចិត្តខ្ញុំសប្បាយមាំអ្ហា!